Lajme nga Shqiptaret ne Maqedoni

Turistë sllovenë në Ohër, lavdërojnë Shqipërinë



Duhet të merrni shembull Shqipërinë e cila po zhvillohet, dhe me hapa të fuqishëm po shkon drejtë zhvillimit të turizmit dhe promovimit të tij. Kështu thotë një turist nga Sllovenia i cili pas kthimit nga Vlora dhe Durrësi me miqtë e tij, vendosi të ndalet edhe në Ohër.
“Ishim në Shqipëri. Ata shumë shpejtë po ecin përpara. Po ndërtohet shumë, po zhvillohen dhe kjo duhet të shihet. Ka shumë hotele të mira dhe të gjitha punët atje zhvillohen në një ritëm shumë të shpejtë. Është shkëlqyeshëm dhe mendoj se duhet që edhe ju të investoni në këtë mënyrë. Edhe këtu shoh se ka turistë”.
“Në Ohër jemi për herë të parë dhe gjithçka që pamë deri tani më pëlqen. Ishim edhe në Shqipëri, atje është diçka e pabesueshme, por ende nuk kam një pasqyrë të vërtetë sesi po zhvillohen punët atje dhe sa vizitohet Shqipëria nga turistët e huaj. Ajo që di është se atje dhe këtu, çmimet janë të ngjashme sikurse ato në Slloveni”.
Nëse numri i turistëve vendorë që për momentin po qëndrojnë në Ohër dhe Strugë është shumë i vogël, krahas liqenit të Ohrit përveç Sllovenëve, këto ditë mund të vërehet një lëvizje e madhe e turistëve të huaj nga gjithkund. Vitin e kaluar vetëm nga Polonia qëndruan 6 mijë turistë.
“Tani duhet t’ua prezantoj dhe ofroj Maqedoninë polakëve, pasi fatkeqësisht për Maqedoninë tani nuk ka promovim që do t’i interesojë dhe tërheqë më tepër turistët që të vijnë këtu. Këtu ka një mundësi të shkëlqyeshme, për të gjithë”, u shpreh Jan Korsak, kryetarë i Odës turistike të Polonisë.
Njerëzit e përfshirë në Turizëm thonë se ka shumë më tepër se gjatë dy viteve të kaluara. Mirëpo, ata flasin haptazi për problemet në qytet.
“Për shembull, në hapësirën prej Çarshisë e deri në Kështjellën e Samoilit, turistët nuk kanë ku të ulen e të pushojnë, nuk kanë ku të pinë ujë, përpos që të blejnë në dy dyqane. Nuk ka as nyje sanitare, në tërë hapësirën vetëm në dy pika ka kosha për mbeturina, pyesin ku t’i hedhin mbeturinat që mbajnë me vete. Ne gjendemi përpara muzeut, por këtu askund nuk shkruan se ky është muzeu i Ohrit. Po ndodh që të pyesim ku është muzeu, ndërsa ndodhemi para tij”, deklaroi Lupço Paneski, punonjës turistik.
Një problem është edhe trafiku i parregulluar në pjesën e vjetër të qytetit. Ky është një nga shqetësimet kryesore për turistët e huaj, përfshi edhe atë të informimit. Nga komuna paralajmërojnë se së shpejti do të hapen tre zyra për informata, ndërsa do të vendosen edhe monitorë ‘Touch Screen’ me të gjitha të dhënat për Ohrin.