Poezi lirike nga Albert Abazi, Vlorë

NË VEND TË PARATHËNIES



Poezi nga Linditë Ahmeti, botuar në revistën “Brezi 9”, dhjetor 2004-janar 2005, Tetovë.



VETË PËRBALLË EROSIT



Një erë e ngrohtë kaloi pranë vetmisë sime, si u ktheva nga bredhjet e pafuntme nëpër mbretërinë e Eratos, e ma tërhoqi vëmendjen! Afërditë moj! Ç’po ndodh? Në drurin e bajames që kam përballë ia dhanë këngës në kor zogjtë e malit. Aurora e grisi terrin dhe e derdhi dritën e artë reljefit të ngrysur. Mëngjes! Mëngjes! Përnjëherë Erosi! Vocrrak bukurosh! Zbriti nga majat e malit duke ngrehur një balonë të madhe prej një cipe prej reje kaltëroshe plot yje brenda. Balona shkon zvarrë prapa, ndërsa ai loz me shigjetat e tij të cilat ndezin flakën e malit të madh anë e mbanë atdheut. I hodha sytë kah thagma para së cilës u gjeta, kurse shikimi im e shpoi balonën prej nga u derdhën vargjet:

Eja

Eja te pema e mallëngjimit

Prapa pendës së vjeshtës

Në Korfuz! Në Korfuz!

Ndër lulet alba mbetur nën gram



Isha fillikat vetëm përballë Erosit. Në Korfuz! O, mallëngjim!

MIRË SE VINI NË LIBRIN TUAJ!



Poetët kanë lindur prej dashurisë dhe DASHURIA ka lindur prej poetëve

“Dashuria është Tempulli i Botës”

HIMNI I MATURANTIT

Dhe sot jemi maturantë

Nesër jo

E padrejtë, sinqerisht

Është kjo!...



Katër vitet e gjimnazit

Qenë të arta,

Sa e padrejtë qënka jeta

S’kthehet mbrapa!...



Ec e mos plas prej marazit

S’ka më çupa,

Fillojnë avaze të tjera

Mbushet kupa!...



S’ka si shkolla e mesme

Për të gjitha gjërat

Kujtimet që mbeten

Si shtatë mrekullirat!...



Se shkolla e mesme

Çdo vit ka maturë

Kjo imja, e vetme

Që nuk vjen më kurrë!...

Goca që unë pata



Tip interesante,

Inatin me mua

Një minut s’e mbante



E kisha, e kam...

Po nesër..., po nesër?

Më i rritur jam,

Në një shkollë tjetër..

BËRA MARRËVESHJE ME ERËN

Bëra marrëveshje me erën

për të zbutur bukuroshen,

furtunës i hapa derën

për të më sjellë ëmbëloshen.



Porosita retë e malit

shirave mos t’u vënë futë;

fustanin e çarë ta lagnin,

ta lodh unë, ta kap, ta zbut...



...Kryeneçja e paepur

fluturonte skaj më skaj

unë, si ujk, i isha qepur

dhe s’i ndahesha kollaj...



Si mund t’i ndahesha unë

gjithë asaj mrekullie,

më tërboi ëndrrën në gjumë

ketrusha që ka pirë diell.



Flladi ngau dalngadalë,

filloi të frynte veriu,

valëvitej fustani i çarë,

bora e zemrës më shkriu.

Stuhia s’ia shkretoi zemrën

po ia mbushi me stuhi.

Loti i rrjedh lëng limoni

unë ta mbledh, me grusht ta pi...



Me solemnitet marrëveshja

poshtë një bredhi u nënshkrua.

Me hov kishte nisur ndeshja

pasaporta s’u kërkua...



Bëra marrëveshje me erën,

retë e malit janë me mua,

era i shpërndau retë

zoçkëza m’u dorëzua...

MOTIV POPULLOR -1

Po grinden zanat në male

të kërkojnë ty në valle.



Do ta pres rrugën e nisur,

gjumin ma ke arratisur.



Dy a tre vite me radhë

ngela pas teje i marrë.



Ndiz e fik si bukurezë,

dy cicat si kokovezë.



Si llokume ai trup,

ku ta puth e ku ta nduk?



Ku e ndjej veten si mbret,

ku çaj si zgalem në det?



Në relievet kodrinore,

në luginën mbretërore!...

MELANKOLI



Të kisha ty ndaj isha i lumtur

dashuria jote më bëri poet,

më ike – si lot i blertë në pisha

më le – anije pa vela në det!...



Të kisha – më ike, të dua – s’më vjen;

rri e mendoj mbytur në ngashërim,

nuk di nga dhimbja e malli për ty

piva tre gota pikëllim...!



Duke fishkëllyer melodinë e këngës

mbi ballë më ranë ca flokë rebel’,

në udhën e ngushtë – imazhi yt

më shfaqet si ylber në zabel.

MË DEHU PRANVERA!...



Lule, mos qëndro te dera

futu pa frikë në shtëpi,

Lule, më dehu pranvera

ngarkuar vrull e stuhi...



Mimozat më gudulisin

sa ma praverojnë muzën!

Bukur ma shtërngojnë rripin

sa nisin të rrudhin buzën...

E ËNDËRROVA FEMRËN



Me lëkurën e fytyrës –

Cipëz qershie,

Me duar shtojzavalle

E flokë engjëllorë

Me sy pranveruar

Të kaltër si qielli,

Me një mes – unazë

E trup përrallor

Rruazë vese në prill...

...i tëri të ndjeja

flohtësi dhe mister,

rrezik e indiferencë,

butësi e ëmbëlsi,

dalldisje epshi, tmerr,

nga e bukura e hijshme,

e dëshirueshmja seks

mahnitësja mjaltore

si një natëz vere,

ditë me nektar maji

në oqean pasionesh

të notoja paskaj.

Ah, zemra ime,

macka ime, e bukur si yll

kur m’i hap sytë,

kur sytë m’i mbyll,

ku ta kisha mendjen?

Te eleganca a finesa,

te nuri a mirësia,

tejdukja e jashtme

a lulëz-bukura?

Ma prishe mendjen që kisha?

Isha unë apo nuk isha?

Të kërkova s’të gjeta,

s’të gjeta, oh s’të gjeta!

Femrën vërtet e ëndërrova

Si në romane, revista, gazeta?!

Më kot u mundova

Dikur i tymosur

Nga kohët e lashta të rinisë

Në agun e zjarrit...

Për një rruazë vese në prill

Këto vargje qenë pothuaj një trill...

NJË SYZEZË

Shkrova e shkrova për një syzezë,

ashtu qëlloi vajza që dua,

pastaj, jam syulli dhe vetë

mos mu mërzitni sykaltra

të bukura.

Natyrisht,

iu duan djem të tjerë

e do të thurin vjershëza të tjera

për ju.







VIZATIM SHAKATOR TË DASHURUARISH



Bota e qytetit

Nuk është vetëm dhele

Lermë, o zog i qejfit

Të merrem me delet.



Si vallë, paska humbur

Për një vajzë Vlora,

Me mua çapkën

Dashke t’ja bësh forra?!



Që nga buzë e detit

Në brinjë të malit

Vjen në këmbë pa lodhur

si shok i sorkadhit?!



Rend e rend në këmbë

Djersa shtatë palë,

Të lutem nga unë

hiqu, more djalë.



Hiqu se m’u qepe,

M’u qepe, s’mu ndave,

Vetëm për një fjalë,

shtatë male çave.





Dhe erdhe më gjete

Në këto lëndina

Ku unë lulëzoj

Dhe me trëndelinat.



Djali im i bukur

Si një kokërr kumbull

Këmbët ke si lepur,

mendjen ke si kungull...

VARIETETE RINORE

Ma plasi zermrën, ma plasi

Një vajzë e këtij gjimnazi.



Vashëza, çupkëza

Ç’sy të bukur që më ka!



E përsosur si hyjni,

i afrohem, larg më rri.



Pas betejash, më në fund,

m’u dorëzua, u mund!



I rrihte zemra përflakur

Si e një zogu të kapur.



Pa sytjena nën këmishë

S’ishte femër, ishte bishë.



Shpërthimet, ku ishim kredhur,

si të Vezuvit të dehur.



Pas ca, një çun i paqethur

Drejt nesh vinte; duke qeshur.



Më tha, çapkëni i shkollës:

“Këtu e hanë pa bërë mollën.



Maturantët nuk i lënë,

zure një zogë të zënë...”



As e zura, as e lashë,

Një ëndërr rinore pashë.

NË DASHURI



Përkulen rrezet dritore,

i tundohen kësaj prove,

nga kontakti buzë më buzë

digjen dy vatra me shpuzë.

MU DUK SE TAKOVA ATË...

...Një melodi mrekulloi ajrin

dhe freskinë e plepave ku rrija,

-ej, miq, e lëmë dy minuta lojën,

një këngë labe nga anët e mia!



Zërin e ëmbël të shoqes e njoha,

sa herë bashkë me të këndova

në dasma, në mbrëmje, në festivale

dhe asnjëherë, as-një-herë s’u lodha!



Më pranë radios iu afrova,

fillova si i marrë, ison me zë,

s’di, e dëgjova këngën, a s’e dëgjova

m’u duk sikur u takova me të...

LIRIKË

Një vashë si fllad më vjen pas

një fjalë të vetme dot s’i flas.



Trupi i saj si hardhi rrushi,

dy buzë që digjen si dritë prushi.



E bukura vashë-si bukurezë,

në qiell yjeve dritën u ndez.



Qerpikët e saj – si hala bredhi,

tek djemtë vjen e ulet ylberi.

MOTIV POPULLOR -3

Një syzezë më çmëndi sonte

përmbi shkëmb ka dalë e rri,

Çika borë i hedh mbi supe,

flladi i Stogoit seç i bën veri.



Në lugjet e Somait lozin sorkadhet

dhe melodia e një fyelli të ëmbël,

ajo vashë si imazh më shfaqet

mbi brinja duke u përqafuar me hënën!

LIRIKA

(Sipas motiveve popullore të Tërbaçit)



1

Vajzë me nishan në gushë,

sa del dielli vjen të puthë!

2

Po të bëhem diell vetë,

do të shpleks tënden gërshetë.



Buzët çelur si petale,

sisatë si portokalle



Çapë lehtë shkon si sorkadhe,

bëhet erë e kapton male!...



3

O ylli që del mbi Çikë,

na mbushe vendin me dritë.





Kur më del, moj majë Vlorë,

ndritë si bora në Qorre!...

DY KËNGË



1

E hollë si fije bari,

larë me vesë behari,

e bardhë borë janari,

e lehtë-kartë cigari,

si zog i bukur mbi borë,

hënëza që prek me dorë!